शेतीचे क्षेत्रच गहाळ केल्याच्या निषेधार्थ आमरण उपोषण
🔸मारेगाव भूमी अभिलेख कार्यालयाचा प्रताप
🔸लक्ष्मीकांत तेलंग उपोषणावर
मारेगाव : प्रतिनिधी
मारेगाव प्रशासनात बहुचर्चित असलेल्या भूमिअभिलेख कार्यालयाचा पुन्हा एक किस्सा समोर आला.चक्क शेतीचे क्षेत्रफळ गायब केल्याने पिडीत युवकाने सदर कार्यालयाच्या विरोधात तहसील समोर आमरण उपोषणाचा एल्गार पुकारला आहे.गहाळ झालेली फाईल हे बहुचर्चित कार्यालय नेमके कसे मिळवते याकडे सर्वांचे लक्ष केंद्रित झाले आहे.
मारेगाव येथील लक्ष्मीकांत गिरजाशंकर तेलंग यांच्या मालकीची जमीन कान्हाळगाव शिवारात आहे.येथील गट नंबर १२/१३/१४ चे जमीन एकत्रीकरण क्षेत्र दुरुस्तीसाठी अर्ज दाखल केला.यासंदर्भातील वरिष्ठांकडे तक्रार दाखल करण्यात आले.उलटपक्षी वरिष्ठांनी सदर प्रकरणाची सखोल चौकशी करून आवश्यक प्रस्ताव महिन्याभरात दाखल करण्याचे सूतोवाच करण्यात आले.
मात्र केवळ बोंबा ठोकणाऱ्या या प्रशासनाने वारंवार पळवाटा काढण्यात धन्यता मानली. आणि वरिष्ठांच्या सूचनेला केराची टोपली दाखविण्यात आली.विशेष म्हणजे कोणत्याही प्रकारची कारवाई करण्यात आली नसल्याने एकत्रीकरण संदर्भातील दि.२६/११/२०१९ मोजणीची पहिली नोटीस बजावली.त्यानंतर सलग तीनदा नोटीस सर्वेतील गटधारकांना बजावण्यात आली मात्र बहाद्दर कर्मचारी शिवारात हजर न झाल्याने मोजणीची बोळवण करण्यात आली. त्यामुळे क्षेत्रफळ मोजणीचा प्रश्न अधांतरी आहे.अर्थात क्षेत्रफळच गायब झाल्याने या शेतीचे क्षेत्रफळ काढून देण्यात यावे या प्रमुख मागणीसाठी तहसील समोर उपोषण सुरू केले आहे. या गंभीर प्रश्नाचा तोडगा हे बहुचर्चित प्रशासन कसा काढतो याकडे सर्वांचे लक्ष लागले आहे.
.jpg)
